विराटनगर । नेपाल पत्रकार महासंघ कोशी प्रदेश समितिले सामाजिक सञ्जालमार्फत पत्रकार तथा महासंघका पदाधिकारीमाथि निरन्तर चरित्रहत्या, गालीगलौज, धम्की र भ्रमपूर्ण सामग्री फैलाउने व्यक्तिमाथि तत्काल कानुनी कारबाही गर्न सम्बन्धित निकायसँग माग गरेको छ।
महासंघका महासचिव हिमकुमारी चेम्जोङद्वारा जारी विज्ञप्तिमा झापाको हल्दीबारी गाउँपालिका–१ निवासी नवराज ओली (नितेश)ले केही समयदेखि नेपाल पत्रकार महासंघ झापा शाखाका पदाधिकारी तथा पत्रकारलाई लक्षित गरी फेसबुक र म्यासेन्जरमार्फत तथ्यहीन, भ्रमपूर्ण र कपोलकल्पित सामग्री प्रसारण गर्दै आएको उल्लेख गरिएको छ।
विज्ञप्तिअनुसार, यसअघि पत्रकारको परिचय दुरुपयोग गरी सञ्चारमाध्यमको नाममा उद्योगी–व्यवसायीसँग रकम मागेको विषयमा उजुरी परेपछि उनलाई सचेत गराइएको थियो। त्यसपछि पनि महासंघ र पदाधिकारीमाथि निराधार आरोप, मानमर्दन तथा दुष्प्रचार जारी राखेपछि साइबर अपराधसम्बन्धी कसुरमा जिल्ला प्रहरी कार्यालय झापामा जाहेरी दर्ता गरिएको जनाएको छ।
महासंघले उक्त जाहेरीका आधारमा जिल्ला अदालतबाट पक्राउ पुर्जी जारी भइसके पनि हालसम्म पक्राउ नपर्नु गम्भीर विषय भएको उल्लेख गरेको छ ।सामाजिक सञ्जालमार्फत निरन्तर गालीगलौज, चरित्रहत्या, अफवाह फैलाउने, धम्की दिने तथा ज्यानसमेत लिने धम्कीका घटनाले पत्रकारहरूको सुरक्षा र प्रेस स्वतन्त्रतामाथि चुनौती सिर्जना गरेको महासंघको भनाइ छ।
नेपाल पत्रकार महासंघ कोशी प्रदेश समितिले यस्ता गैरकानुनी तथा अराजक गतिविधिको घोर भर्त्सना गर्दै दोषीलाई तत्काल कानुनी दायरामा ल्याई कारबाही गर्न सम्बन्धित निकायसँग माग गरेको छ।
जिल्ला प्रहरी कार्यालय झापाका अनुसार पक्राउ पुर्जी जारी भएपछि ओली फरार रहेकोले खोजी कार्य भईरहेको छ ।
