काठमाडौं । फिलिपिन्समा शुक्रबार सैन्य तालिमका क्रममा वायुसेनाका दुईवटा विमान आकाशमै ठोक्किँदा चार जना पाइलटको मृत्यु भएको छ। दुर्घटनापछि फिलिपिन्सको वायुसेनाले सम्बन्धित प्रकारका सबै विमानको उडानमा रोक लगाएको छ।
स्थानीय समयअनुसार दिउँसो ३ः५१ बजे राजधानी मनिलाको दक्षिणमा पर्ने लिपा सहरस्थित फर्नान्डो एयर बेस नजिकै दुर्घटना भएको हो। तालिममा रहेका दुवै ‘एसएफ–२६०’ विमान कम उचाइमा उडिरहेका बेला एकआपसमा ठोक्किएका थिए। दुर्घटनापछि एउटा विमानको भग्नावशेष सैन्यकर्मीहरूको ब्यारेक नजिकै खसेको बताइएको छ।
दुर्घटनापछि फिलिपिन्सको वायुसेनाले एसएफ–२६० विमानहरूको उडान तत्कालका लागि स्थगित गरेको छ। दुर्घटनाको कारण पत्ता लगाउन अनुसन्धान भइरहेको र छानबिन पूरा नभएसम्म यी विमान सञ्चालनमा नल्याइने जनाइएको छ।
एसएफ–२६० इटालीमा निर्मित तालिम विमान हुन्। फिलिपिन्सले सन् २०१० र २०११ को अवधिमा इटालीको कम्पनीबाट यस्ता १८ वटा विमान खरिद गरेको थियो। वायुसेनाका पाइलटलाई उडानसम्बन्धी तालिम दिन यी विमान प्रयोग हुँदै आएका छन्।
फिलिपिन्सले लामो समयदेखि आफ्नो सैन्य क्षमतालाई आधुनिक बनाउने प्रयास गरिरहेको छ। तर, आवश्यक बजेटको अभावका कारण सैन्य आधुनिकीकरणका योजनाहरू कार्यान्वयन गर्न चुनौती देखिएको छ। वायुसेनाका विमानको क्षमता विस्तारसँगै नौसेना र स्थलसेनाको क्षमता अभिवृद्धि गर्नु पनि फिलिपिन्सका लागि महत्त्वपूर्ण आवश्यकता बनेको छ।
विशेषगरी दक्षिण चीन सागरमा चीनसँग बढिरहेको क्षेत्रीय तनावका कारण फिलिपिन्सले आफ्नो रक्षा क्षमता सुदृढ गर्नुपर्ने दबाब बढ्दै गएको छ। यद्यपि, बजेट अभाव र विभिन्न योजनामा भइरहेको ढिलाइले सैन्य आधुनिकीकरणको प्रक्रियालाई प्रभावित पारिरहेको छ।
