शिवसताक्षी । शिवसताक्षी नगरपालिकाको दुधेमा आदिकवि भानुभक्त आचार्यको २१२ औं जन्मजयन्ती मनाइएको छ। सताक्षीधाम साहित्य सङ्गमको आयोजनामा भएको कार्यक्रममा साहित्य, संगीत र रामायाणलाई संगीतबद्ध गरी प्रस्तुत गरिएको थियो ।
सङ्गमका उपाध्यक्ष पदमप्रसाद दाहालले भानुभक्त आचार्यको योगदानमाथि प्रकाश पार्दै उनको साहित्यिक धरोहर नेपाली भाषाको उन्नतिमा ऐतिहासिक रहेको बताए। पत्रकार छबिलाल दवाडीले रामायण वाचन गरे भने यदुनाथ दाहाल र रेवत खनालले सांगीतिक ढङ्गमा रामायणको गायन प्रस्तुत गरेका थिए ।
कार्यक्रमको विशेष आकर्षणका रूपमा गङ्गाराम खनाल, हाङ ओझा थेगिम, भिजन गुरागाईं, सन्देश भेटुवाल, सन्तोष लावती, पदमप्रसाद दाहाल, लक्ष्मीकुमारी ताजपुरिया, सन्ध्या कर्ण र फगेन्द्र अधिकारीले आफ्ना रचना प्रस्तुत गर्दै भानुभक्तको सम्मानमा भावनात्मक अभिव्यक्ति प्रस्तुत गरे। गीत प्रस्तुतिमा वीरेन्द्र थोक्लिहाङ र बिराज बि.क. को गायनले कार्यक्रमलाई थप मनोरञ्जक बनाएको् थियो ।
कार्यक्रमका लागि ब्यानर लेखन तथा भानुभक्तको तस्वीर तयार पार्ने कार्य शिक्षक शिवकुमार आङ्बोले गरेका थिए।
कार्यक्रमको दौरानमा स्थानीय समाजसेवी तुलसीनाथ पौडेल (प्रकाश) को ४३औं जन्मोत्सव पनि मनाइएको थियो। सहभागीहरूलाई फलफूल र चिया वितरण गरी उनकी धर्मपत्नी नम्रता बस्नेत पौडेल तथा परिवारजनले जन्मोत्सवलाई सार्वजनिक रुपमा मनाउँदा कार्यक्रममा उत्साह थपिएको थियो।
साहित्यिक र सांस्कृतिक चेतना अभिवृद्धि गर्ने उद्देश्यले आयोजित कार्यक्रमले स्थानीय समुदायमा साहित्य र कला प्रतिको झुकाव झनै प्रगाढ बनाएको सताक्षीधाम साहित्य संगमका अध्यक्ष उमानाथ दाहालले बताए ।
सताक्षीधाम साहित्य सङ्गमका अध्यक्ष उमानाथ दाहालको अध्यक्षतामा भएको कार्यक्रमको सञ्चालन सचिव यादवप्रसाद घिमिरेले गरेका थिए, भने सदस्य श्रीप्रसाद खरेलले स्वागत मन्तव्य राख्दै अतिथिहरूको स्वागत गरेका थिए।
