ललितपुर । जिल्ला प्रशासन कार्यालय ललितपुरले आज बिहान ७ बजेदेखि मध्यराति १२ बजेसम्म कर्फ्यु आदेश जारी गरेको छ। प्रमुख जिल्ला अधिकारी (सिडिओ) सुमन घिमिरेका अनुसार ललितपुर महानगरपालिका–२, ४, ९, १८ र २५ का विशेष क्षेत्रलाई चार किल्ला तोकेर कर्फ्युमा राखिएको हो।
वडा नं. ४, १८ र २५ अन्तर्गत पर्ने भैंसेपाटी क्षेत्रमा पूर्वतर्फ भैंसेपाटी–बुंगमती सडक, पश्चिमतर्फ सिजी हाउजिङ र चोभार गल्छी सडक, उत्तरतर्फ एकान्तकुनास्थित गायत्री पेट्रोलपम्प मुनिको विष्णुदेवी मन्दिर र दक्षिणतर्फ इटनी जाने ओह्रालो मार्गसम्मको भूभागमा कर्फ्यु लागू गरिएको छ।
त्यस्तै, सानेपास्थित वडा नं. २ मा पनि सार्वजनिक गतिविधि रोक्न कर्फ्यु लगाइएको छ। सानेपा चोकदेखि इन्द्राणी मन्दिरसम्मको पक्की सडक, बल्खु पुलदेखि मनमोहन पार्कसम्मको बागमती करिडोर सडक, चक्रपथको सर्भिस लेन (बल्खु पुल–सानेपा चोक) र इन्द्राणी मन्दिरबाट बागमती करिडोरतर्फ जाने बाटोलाई कर्फ्यु क्षेत्रमा राखिएको प्रशासनले जनाएको छ।
वडा नं. ९ को च्यासल क्षेत्रमा भने पूर्वमा मनोहरा खोला करिडोरको झोलुङ्गे पुलदेखि, पश्चिममा च्यासल रंगशाला, उत्तरमा मनोहरा खोला र दक्षिणतर्फ पश्चिम मल पोखरी जाने बाटोसम्म कर्फ्यु आदेश लागू गरिएको छ।
प्रशासनले कर्फ्यु अवधिमा भेला, जुलुस, प्रदर्शन, सभा वा घेराउ गर्न नपाइने चेतावनीसमेत दिएको छ।
